Rěčne kućiki

Šesćiměsta

21. awgusta běše Dźeń Hornjeje Łužicy. Při tutej přiležnosći wusyłaše rozhłós krótke rozpominanje wo stawiznach našeho regiona. Při tym dźěše mjez druhim wo „Sechsstädtebund“ – Zwjazk šěsć městow. Skrótka a w jednym słowje zjima jedyn z rozmołwnikow to jako šěsćměsta, tola tajka twórba njewotpowěduje tradiciji. Po tradiciji so tutomu zwjazkej mjenujcy praji šesćiměsta. Tuta zestajenka wobsteji z ličbnika šěsć w starej formje genitiwa a z pluraloweje formy substantiwa město. Pomjenowanje šesćiměsta njeje jenička twórba z tutej strukturu w hornjoserbšćinje: zetkamy ju na přikład při pomjenowanjach kombinacijow wjacorych disciplinow w lochkoatletice. Tak znajemy pjećibój – „Fünfkampf“, sedmibój – „Siebenkampf“ a dźesaćibój – „Zehnkampf“. Z konteksta burskich kaznjow znajemy sedmispancow, z matematiki wosmiróžk a z časa NDR tež pjećilětku. Hižo tuta horšć přikładow nam pokazuje, zo reprezentuje pomjenowanje Zwjazk šesćiměstow produktiwny słowotwórbny muster hornjoserbšćiny.

S. Wölkowa

temy: serbske wotpowědniki za němske słowa, słowotwórba

klučowe słowa: substantiw, zestajenka, ličbnik

hesła: šesćiměsta, Sechsstädtebund, zwjazk šesćiměstow, pjećibój, sedmibój, wosmiróžk, pjećilětka